【宣言】美颂共和党宣言 英文版

    浏览量:666

    DAWDAN SHADIK SHATUP TENG SHA AWNGDANG NA

    JJ Lum Dau   (28 March 2017)


    1504662531998036.jpg


    Shingyim masha shagu gaw tinang a amyu, tinang a mungdan maden zinghka wa hkra shadik shatup sa na matu lit nga ai. Rai yang Myen hkawhkam Anoratha, Bayinnong, Alongphaya ni gaw Myenmung na Myen n re ai myusha yawng hpe shamyit kau lu jang mungdan ngwi pyaw simsa na re, nga ai. Shing rai prat 1, 2, 3 nga nna shamying nhtawm  shadik shatup wa ma ai shaloi, Pyu, Kan-yan, Thet zawn re ai myusha wunawng uwa hpe shamyit kau lu masai.


    British ni Myenmung hpe zing la ai shaloi, Myen n re ai myusha kaba Mon, Kayin, Kayah, Yahkaing myu 4 sha ngam sai. Dai hpang British gaw Sam, Kachin, Chin mungdan ni hpe matut zing la nna Myenmung kaw shalawm kau hkrum ai hpe yawng chye nga shajang sai. Myenmung shanglawt lu na shing-ran mu ai hte Myen amyu n re ai ni hpe matut shamyit na matu prat 4 nga nna masat la wa masai. Aung San gaw, Myen hkawhkam marai 3 shalat hpang ai masing hpe ginchyum dat na matu ram htum ai ningbaw tai wa sai. Shing rai, Sam, Kachin, Chin ni hpe zinlum la na matu Sam hpe shawng sa shalen na myit wu yang, dai Sam ni gaw, shi hpe madat ya na n re, nga hkam la ai majaw, Kachin hpe sa shanyam ai hte awngdang wa ai marang e, Kachin hpe matut machyu nhtawm Sam yan Chin hpe mung zinlum la lu sai. Myen lap mi lu jang, Sam, Kachin, Chin mung lap langai hpra lu na lam myit hkrum gasadi kaw shalawm dat ai majaw kaga Myen ningbaw ningla ni hpe pawt singdawng shangun wa sai.


     Myen hkawhkam prat 1, 2, 3 a yaw shada ai gaw, Myen n re ai myusha ni hpe shamyit kau na matu re. Rai yang Aung San gaw Myen amyu n re ai Sam, Kachin, Chin ni hpe ahkaw ahkang maren madang jaw na matu gasadi jaw ai gaw shut kaba rai sai. Shi hpe sat kau jang, shi hte myit hkrum tawn ai gasadi mung hten mat na sai kam let, Aung San a asak hpe dawm kau masai. Kaja sha nga yang, Aung San yaw shada ai gaw, bumnga masha ni hpe shalen tawn nna shanhte lu wa ai ahkaw ahkang a ntsa myit pyaw myit dik nga shangun let, hkinjang kaja ai hte yawng hpe apyaw sha shamyit kau na masing rai nga ai. Lama Aung San a asak dawm kau n hkrum ai rai yang, kade nna ai laman Sam, Kachin, Chin ni sha n-ga, Myen amyu n re ai ni yawng hte hpe shamyit kau lu na sai.


     Shawng nnan Suu Kyi gaw shi a kawa yaw shada ai hpe myit rai n hkawn hkrang ai rai nna, shi a kawa gaw myit hpraw san ai hte shadik shatup wa ai hku hkam la wa sai. Shing rai shi mung bumnga masha ni a maga de shanang ai ga manaw hte shaga wa sai hpe jawm na wa yu saga ai re. Dai hpang Than Shwe kaw nna Aung San a yaw shada lam hpe Suu Kyi atsawm chye na hkra sanglang dan ang sai. Dai shaloi, Anoratha woi awn wa ai yawshada lam awngdang wa lu na matu, tsaban 21 Panglung myit hkrum lam kade ahkyak ai hpe Suu Kyi asan sha chye na hkra sanglang dan ai hpang, Suu kyi gaw Than Shwe maga de shanang ai ga manaw nsen hte shaga pru wa sai. 


     1947 ning na Panglung myithkrum gasadi ajet hpe ndai ten hta tsaban 21 Panglung myit hkrum gasadi masu hte nlu jahten yang n mai sai majaw myit hkrum sen sa htu ya na masha ni hpe byin mai ai ladat lang nna shakut nga masai. Ndai myit hkrum gasadi jaw nhtawm sen htu ya dat ai hte, jin jin hkyen lajang tawn magang sai maigan mungdan hkan na arang kaba shaw na sahti kaba ni jawm madi shadaw la ai maraang e, Myenmung gaw tsepkawp simsa sai nga nna mungkan ting kaw ndau dat let rawtmalan hpung ni kaw na laknak yawng zing la kau na masa nga ai. Laknak naw hpai nga yang pyi mungmasha ni hpe kade roirip sat nat nga ai rai yang, laknak dawm kau sai hpang gaw tsun shara n nga na sai. KIO/KIA hkum shagu gaw mungmasha rai nga ai Nu Wa Hpu Nau ni a saidaw saichyen ni hkrai re. Ndai mungkan kaw tinang a saidaw saichyen hta manu grau tsaw ai ja gumhpraw hte arawng aya ngu ai mung n nga na re.


     Dingda de na Mon hte Kayin rawtmalan hpung ni a shiga hpe daini na lu ai hku rai yang, mungmasha ni aja awa ninghkap nga ninglen, KNU ningbaw gaw, masa hta hkan nna yen n lu sai majaw Myen asuya hpe madi shadaw na matu tawk hprut daw dan nu ai. NMSP kaw na Myen hte ganawn nga ai lit hkam nkau Myen asuya hpe madi shadaw ai raitimung, Ningbaw Kaba hte Dap Awn Daju yan gaw mungmasha ni madi shadaw ai maga de ngang ngang tsap nga ma ai lam na chye lu ai. Dai hte maren, kaga rawtmalan hpung ningbaw ningla ni mung, masa hta hkan nna dawdan wa na masa nga ai. Kaja sha nga yang, tinang a saidaw saichyen ni a myi pyi atu rai jawm madoi yu nga ai maga de shanang nna ahkum ara jawm dawdan sa ga law. Teng teng awngdang na re. 


     Hpang jahpum shanglawt lu wa ai mungdan ni gaw, East Timor, North Sudan, South Sudan zawn re ai mungdan ni rai ma ai. East Timor shanglawt lu wa na matu UN hte jahtuk matut ya ai wa gaw hku hkau ai jinghku dingsa rai nna, North hte South Sudan shanglawt lu wa na matu Chairman of African Union mung rai, Nigeria mungdan a President mung rai, re ai Mr. Obasanjo Olusegun gaw, Sudan manghkang hte seng nna Lagos mare kaw sanglang dan ai kaw hkan na lawm ai shaloi, tinang a man na awmdawm shanglawt lu lam a masing hpe myit dum wa ai. Manghkang langai hte langai a shingdu lam nbung timung mahkrum madup hta kungkyang ai International Lawyer ni hpe machyu mai nga ai ngu mu wa ai. Kaga lam langai, French asuya gaw Vietnam, Combodia, Laos mungdan ni hpe zing la uphkang wa ai hpang, shanhte hpe shanglawt bai jaw ai shaloi, shi ra sharawng ai wa hpe gumhpawn jaw kau ai ladat n lang ai sha, shawng de zing la hkrum ai mungdan madu ni a lata kaw hkrak sha nhtang ap ya wa sai. Raitimung, British asuya gaw,  Myen mungdan, Sam mungdan, Kachin mungdan, Chin mungdan ni hpe laksan rai zing la timung, shanglawt bai jaw ai shaloi mungdan madu ni hpe laksan bai nhtang jaw ai lam n-galaw ai. Dai hta n-ga, shawng e, Myen hkawhkam ni zing la ai Mon hkawhkam mungdan, Yahkaing hkawhkam mungdan, Kayin mungdan, Kayah mungdan ni hpe mung ashawng ahpang n myit yu ai, gumhpawn nna Myen hpe ap ya kau ai gaw tsepkawp shut nga sai. Shing re ai masa hta hkan nna, British asuya hpe mara shagun na kun? Myen asuya hpe mara shagun na kun? Masha ngu ai gaw, kadai mung kade a akyu ara hpe ahkyak tawn ma ai hpe myit dum wa ai.


     Ndai lam hte seng nna mungkan tara hpaji ninghkring ni hpe san yu ai shaloi:- Kaja sha nga yang, ndai lam Aung San hte hpa nseng ai. British asuya gaw mungkan ting na shanhte zing la tawn ai mungdan ni yawng hpe shanglawt jaw na matu hkyen lajang tawn chyalu re. Dai shim lam hpe Aung San chye kau ya ai majaw aten dep myiman tam la ai masing sha rai wa sai. Shing rai hpang e, “Aung San hpe Myenmung a shanglawt kawa” nga nna gumhkawng wa sai. Myit yu ga. Sam, Kachin, Chin ni a mungdan gaw Myenmung hte hpa n seng ai. British gaw dai mungdan ni hpe zing la ai lam Myen hte mung hpa n seng ai. Dai majaw shanglawt bai jaw ai shaloi mung, Myen hte achya na lam hpa n nga ai. Seng ang ai ni hpe dingtawk bai nhtang ya ra na sha re. Byin mat wa ai gaw, Aung San myiman tam ai kaw hkan zawzang lawm ai marang e, zang shanut mat ai sha rai wa sai. Shanut nga sai manghkang hpe jasan la na matu gaw, shada mara shagun hkat nga na malai, tinang nan gram sharai la ra sai, nga ai.   


     1947 Panglung myit hkrum gasadi laika gaw Sam, Kachin, Chin mungdan hte galai la na matu nachying manu rawng ai lakmat gasadi ajet nan rai sai. Dai lakmat ajet hpe tsaban 21 Panglung zuphpawng kaw n seng n ang ai myusha ni hpe mung shalawm la hkra rai, shanut shanat woi shalau dang-rang hkat shangun nhtawm zuphpawng a mahtai masu hpe namdum maisau maga de gale kau ya hkyen nga ma ai. East Timor hte Sudan gaw hpang jahtum mungdan nnan hku shalat la ai ladat hpe mung malawm magawm hkaja mai na re. Raitimung anhte a mungdan gaw, moi chyaloi nhkoi kaw nna grin nga chyalu rai sai majaw tekjum ai ladat kaw n bung na re. Tara Ninghkring ni hpe machyu nhtawm shaning 70 tup machyi wa ai cancer ana hpe tsi shamai la lu na re. Dai tsi shamai na Doctor hpung hta manghkang shalat hpang ai British woi awn ai kaw sakse hku hkan shang lawm na matu India zawn re ai mungdan nkau mung hkan shang lawm ra na lam, seng ang ai hpaji ninghkring ni kaw nna shing ran mu ya nga ma ai.


     Anhte Wunpawng Myusha ni gaw dam lada ai hkam la lam hta npawt nhpang tawn ai amyu ni rai ga ai. Shing rai bungli kaba masing hta mung damlada ai ningmu hpe madung tawn wa saga ai. Tinang a mungdan simsa wa lu na matu gaw hpuba hpushawng ni hte rau hkam sha mayu ai myit rawng ga ai rai nna, tinang a mungdan simsa lam lu wa ai shaloi, simsa ai namchyim mung hpuba hpushawng ni hte rau hkam sha mayu ai amyu rai ga ai. Myenmung kaw Myen amyu n re ai myu 7 yawng gaw, munghpawm Myenmung, nga nna ahkum ara pawnghpawm nga na hpe ra sharawng ai ni hkrai rai ga ai. Myen amyu langai sha kaga myu 7 hpe shamyit kau nna shi hkrai mungdan ting hpe ka-up sha lu na matu gyipgyeng ai tingyeng myit hte ndi nda rai shakut nga masai. Shing rai daini na masa hta hkan nna, Myen n re ai anhte myusha 7 jawm ra sharawng ai hte maren, anhte a mungdan ni hpe pawng shabawn la nna munghpawm mungdan hkrang shapraw la ra saga ai. Shing ngu yang, ngai nam kahtawng na dingla langai a matu gaw, yupmang zawn nawn ya ai. Raitimung, machye machyang hkumtsup sai ni a matu gaw, hkrak sha byin mai ai hpe asan sha mu ya nga ma ai.


     Mon hkawhkam mungdan hte Yahkaing hkawhkam mungdan a madang bung ai hte maren, shanhte a labau shingdu lam hta hkan nna awmdawm ahkaw ahkang lu ai mungdan shalat la na matu mahkrun manu wa ai hta hkan nna tara ninghkring ni hpe machyu mai ai mahkrun mu nga manu ai. Dai hte maren, hpunau Kayin hte Kayah mungdan a matu mung, kaga hpunau ni hte rau gumhpawn nna ahkyak la na matu myit hkrang nga masai lam na chye lu ai. Shada a lapran kaw ntsa lam jahtuk hkat ai mung nga masai lam soi sam shiga na lu ai.


     Myen ni chyawm gaw shanhte hkrai laksan nga mayu ai ni rai nna, Myen amyu n re ai ni hpe shamyit kau lu hkra shaning hkying lam hti nna atik anang shakut wa masai. Yehowa Karai Kasang a tsawra shawang myit gaw dam lada nna mauhpa lam hpringtsup nga ai. Shaning tsa lam hti nna mayam tai wa ai Yuda amyu ni gaw, hpang jahtum kasi madun lu ai mungdan madu byin tai lu na matu atsam rawng wa ai marang e, laklai ai mungdan hpe matsaw lahta tang kaw na shaman ya sai. Anhte a myusha ni gaw prat chyanat hta roirip hkrum sha wa ai kaw na, daini na ten hta Yehowa shaman ya ai machye machyang hte htauli htaula myit hpe asung jashawn chye wa ai marang e, galaw ging ai yi-ngam ni hpe mu mada wa nhtawm shadik shatup chye ai prat de du wa magang sai.


     Shawng nnan myi hpaw wa ai hpuba hpushawng ni zawn, shata jan de du hkra rai n chye lung timung, tinang a myusha ni hpe roirip sat nat nga ai prat kaw na lawt wa lu nhtawm, Yehowa jaw da ya ai mungdan hpe bai madu la lu na atsam mung lu nga saga ai re. Dai hpe Nu Wa Hpu Nau ji nbang yawng hte jawm kam let myit hkrum mang-rum rai, tinang kaw rawng ai n-gun atsam hta maigan hkan na jinghku ni a atsam hpe mung gang bang jahkum la nhtawm satan wa roi sha nga ai prat kaw na lawt lu hkra, myit hkrum mang-rum rai tinang tsap nga ai shara kaw na dephkap ai atsam hte shakut sa wa ga, ngu nna hkungga kamhpa ai shawang myit hte aja awa lajin dat nngai law. 









    5

关注我们

    关注美颂中文网,体验美颂传统文化